Ku wa mbere tariki ya 04 Nzeri 2023 mu cyumba cy'inama cy'Inteko Ishinga Amategeko ku Kimihurura, Abakozi b'Inteko Ishinga Amategeko, aba Komisiyo y'Abakozi ba Leta, ab'Urwego rw’Ubugenzuzi Bukuru bw’Imari ya Leta n'aba Komisiyo y'Uburenganzira bwa Muntu baganirijwe na Minisiteri y'Ubutabera kuri Politiki y'Ubutabera Mpanabyaha no kuri Politiki yo Gukemurira Amakimbirane Hatisunzwe Inkiko.

Mu ijambo rye, Umunyamabanga Uhoraho muri Minisiteri y'Ubutabera akaba n’Intumwa Nkuru ya Leta Yungirije, Me Mbonera Théophile yabwiye abitabiriye ikiganiro ko gukemurira amakimbirane hatisunzwe Inkiko byahozeho na mbere mu muco w'abanyarwanda. Ati: "Icyo iyi Politiki izanye ni uguha umurongo ufatika ibyari bisanzwe bikorwa."

Yanavuze kandi ko Politiki y'Ubutabera Mpanabyaha igamije kugorora uwakoze icyaha akagaruka mu muryango nyarwanda awufitiye umumaro kandi yiyunze n'uwakorewe icyaha.

“Gukemura amakimbirane hatisunzwe inkiko no kugira uruhare mu butabera nsanasano ni umusingi w’ubutabera bwunga, bwihuta, budahenze kandi budaheza.”

“Umuco wo gukemura amakimbirane mu bwumvikane ukomoka mu mateka yacu. Tuwusigasire twubake u Rwanda twifuza.”

“Twese dufatanye gukumira ibyaha tugire uruhare mu butabera bugorora uwakoze icyaha bugafasha uwahohotewe.”

“Umuryango utekanye, udaheza kandi ukemura ibibazo, aho abaturage bagira uruhare mu kwikemurira amakimbirane no kurwanya ubugizi bwa nabi n’ibyaha, bayobowe kandi  bashyigikiwe n’inzego zibifitiye ububasha.”